திண்ணை.காம் கோபால் ராஜாராம் - ராஜ் தொலைகாட்சி நேர்காணல்

கோபால் ராஜாராம் தமிழ் இலக்கிய உலகுக்கு நன்கு பரிச்சயமான பெயர் மட்டுமல்ல, தமிழ் இலக்கிய உலகால் மதிக்கப்படும் பெயரும்கூட. வானம்பாடி, கசடதபற போன்ற எழுபதுகளின் இலக்கிய இயக்கங்களுடன் இணைந்து இயங்கியவர். தாமரை, படிகள், சிகரம், கணையாழி உள்ளிட்ட பல சிற்றிதழ்களில் எழுதியவர். தமிழ்நாட்டில் வீதி நாடகக் குழுக்களைப் பிரபலப்படுத்தியதிலும் முன்னெடுத்துச் சென்றதிலும் பங்காற்றியவர். "கட்டுடைத்தல்" என்கிற விமர்சன முறையைத் தமிழுக்கு அறிமுகப்படுத்திய முன்னோடிகளுள் ஒருவர். அந்தக் "கட்டுடைத்தல்" இன்றைக்குத் தமிழ் எழுத்தில் அடைந்துள்ள விபரீதப் பரிமாணங்கள் குறித்த கவலையும் விமர்சனங்களும் கொண்டவர்.

பாதல் சர்க்காரின் நாடகத்தைத் தமிழில் மொழிபெயர்த்திருக்கிறார். அலுமினியப் பறவைகள் என்ற ஒரு கவிதைத் தொகுதி வெளியாகியிருக்கிறது. சுருக்கமாகவும் கூர்மையாகவும் விமர்சனப் பாங்குடனும் சொல்ல விரும்புவதை லகுவாகச் சொல்லி எழுதுவதில் தேர்ந்தவர். ஆழ்ந்த வாசகர். அவருடன் பேசிக் கொண்டிருக்கும்போது பேச்சினூடே சரளமாகப் பெரியாரும் வருவார், தேவதச்சனும் வருவார், ஜெயகாந்தனும் வருவார், சுந்தர ராமசாமியும் வருவார், அமெரிக்க எழுத்தாளர்களும், லத்தீன் அமெரிக்க எழுத்தாளர்களும் இன்னபிற பலரும் வருவார்கள். அரசியல், கலை, இலக்கியத்தில் அத்தகைய புலமை வாய்ந்தவர். இலக்கியத்தில் தனக்கென்றத் தனிப்பட்ட ஆணித்தரமான கருத்துகள் இருந்தபோதும், அரசியல் கட்சிகள்/கொள்கைகள் சார்ந்த பத்திரிகைகளில் எழுதி வந்தபோதும், கொள்கை என்கிற எந்த முக்காட்டையும் மாட்டிக் கொள்ளாதவர். சித்தாந்தங்களின் பிடியில் சிக்கிக் கொள்ளாமல், எல்லாரையும் வாசிக்கிற நேசிக்கிற பக்குவம் பெற்றவர். அதனாலேயே, எல்லாக் கூடாரங்களிலும் இவருக்கு நண்பர்கள் உண்டு.

எழுத்தைப் போலவே நாடகங்களிலும் சினிமாவிலும் ஆர்வமும் புலமையும் மிக்கவர். அம்ஷன் குமார் இயக்கத்தில் வெளிவந்த, கி.ராஜநாராயணனின் "கிடை"யை அடிப்படையாகக் கொண்ட "ஒருத்தி" திரைப்படத்தின் தயாரிப்பாளர். நியூ ஜெர்ஸியில் இயங்கும் சிந்தனை வட்டம் மூலமாகக் தமிழ்நாடு - நேற்று இன்று நாளை (அறிஞர் பார்வை) ஆய்வு நூல் வெளிக்கொணர்தல், குறும்பட விழா நடத்துதல் ஆகியவற்றில்அரும்பங்கு செலுத்தியவர்.

திராவிட இயக்கத்தில் ஆர்வமுடையவராகத் தொடங்கி உலகளாவிய இலக்கிய அறிவும் நுண்ணிய பார்வையும் பெற்றவராகப் பரிணாம வளர்ச்சியடைந்தவர். பெரியார் மீது உயர்ந்த மரியாதை உடையவர். இருபது ஆண்டுகளாக கணிப்பொறித்துறையில் மென்பொருள் வடிவமைப்பாளராகப் பணியாற்றி வருகிறார். தற்போது அமெரிக்காவின் கனெக்டிகட் மாநிலத்தில் வசித்து வருகிறார்.

ஆறு ஆண்டுகளாகத், தமிழின் முதல் இணைய இதழான திண்ணை.காம் என்கிற தமிழின் புகழ்பெற்ற இணைய பத்திரிகையின் ஆசிரியராகப் பணியாற்றி வருகிறார். ஒரு பத்திரிகை எவ்வளவு ஜனநாயகத் தன்மையுடன் இருக்க வேண்டும் என்பதற்கு உதாரணமாகவும், பத்திரிகை ஆசிரியர் எவ்வளவு குறைவாக படைப்பாளியின் எழுத்தில் கை வைத்துத் திருத்தவோ நீக்கவோ வேண்டும் என்பதற்கு உதாரணமாகவும், இவர் வழிகாட்டுதலின் கீழ் இயங்கி வரும் திண்ணை.காமைச் சொல்லலாம். சமீபத்தில் தொடங்கப்பட்ட இணையப் புத்தகக் கடையான AnyIndian.com-ன் பங்குதாரராகவும் தலைமைச் செயல் இயக்குநராகவும் (CEO) இருந்து வருகிறார்.

இவருடைய நேர்காணல் ஒன்று ராஜ் தொலைகாட்சியில் ஜூன் 9, 2005 (வியாழன்) காலை இந்திய நேரம் 8 மணியிலிருந்து 9 மணிவரை ஒளிபரப்பாக இருக்கிறது. நிகழ்ச்சியின் பெயர் தினம் தினம் (மக்கள் மேடை). ஒருமணி நேரம் நடக்கும் இந்நிகழ்ச்சியில் கோபால் ராஜாராமை நேர்காணல் செய்கிறார் திருமதி. நிர்மலா பெரியசாமி.

இந்நிகழ்ச்சியில் ராஜாராம் தம்முடைய இலக்கிய அனுபவங்கள், திண்ணை.காம் அனுபவங்கள், AnyIndian.com ஆகியன பற்றியெல்லாம் பேசக்கூடும் என்பது என் ஊகம். இங்கிருந்தபடி ராஜ் தொலைகாட்சியைப் பார்க்கிற வாய்ப்பு எனக்கில்லை. எனவே, நிகழ்ச்சியைப் பார்க்கிற அன்பர்கள் அதுபற்றிப் பகிர்ந்து கொள்ளுமாறு வேண்டுகிறேன்.