அம்மா

சித்திரை அமாவாசையில்
நான் பிறந்தேன் என்றார்

புதன்கிழமை
சாயங்காலம் என்றார்

ஆபரேஷன் செய்து
வெளியில் எடுத்ததார்கள் என்றார்

நல்ல எடையும்
உயரமும் கொண்டிருந்தேனென்றார்

பிறக்கும்போதே
கருகருவென்று
நிறையமுடி என்றார்

பிறந்தவுடன்
கணீரென்று அழுதேனென்றார்

அப்பாக்கும்
தாத்தா பாட்டிகளுக்கும்
அளவிலாத சந்தோஷமென்றார்

நர்சுகள் தூக்கி
என்னைக் கொஞ்சுவர் என்றார்

தொந்தரவு செய்யாமல்
தூங்கிக் கொண்டிருப்பேன் என்றார்

குழந்தையில்
என்ன செய்தேன் என்றால்
பலர் ரசிக்கக்
குறும்புகள் செய்தேன் என்றார்

கர்ப்பக் காலமும்
ஆபரேஷனும் கொணர்ந்த
வலிகளைச் சொன்னதுமில்லை
நான் கேட்டதுமில்லை

Written On: Apr 14, 2004