தொலைபேசி யெடுக்கும் முடிவுகள்

தொலைபேசி யெடுக்கும் முடிவுகள்

- பி.கே.சிவகுமார்

அப்பாவுக்கும் வயசாச்சாம்
இலக்கியமும் அலுத்துப் போச்சாம்
நானாவலசை ராமன்
கள்மொந்தை கட்டியிருக்கிறார்
உனக்குப் பிடிக்குமே
போதும் வந்துவிடு
பேசிக்கொண்டிருக்கலாம் என்கிறார்

அம்மாவுக்கு இன்னும் ஆஸ்த்துமாவுடன்
இடைவிடாத போராட்டம்
போதும் வந்துவிடு
நீ பக்கத்தில் இருந்தா
தைரியமா இருக்கும் என்கிறார்

போதும் வந்துவிடு வென்கிற
தங்கைக்கும் மைத்துனருக்கும்
அரசாங்க உத்தியோகம்
சிட்டியில் பிளாட் கார்
வாங்கும் அவசரக் கனவுகள்
நீ திரும்பி வந்தா
உன் தங்கைன்னு சொல்லிக்கற
அந்தஸ்து வேணாமா வென்று
என் அந்தஸ்து பற்றிக்
கவலைப்பட்டுச்
சிரிக்க முயல்கிறாள்

மாமியாருக்குத்தான்
யாருமில்லை
வருத்தமு மில்லை
வாரமொருமுறை மகளின்
நல்லா இருக்கேன்மா வும்
பேரக்குழந்தைகளின்
ஹாய் பாட்டியும்
போதும வருக்கு
மீதி நேரங்களில் மென்று துப்ப
புகையிலையும் வெற்றிலைச்
சாறு மிருக்கின்றன

சொந்தங்களின் சங்கடங்களும்
சண்டையுமில்லாத
நிம்மதியான வாழ்க்கை
இங்கேயே இருக்கலாம்
என்கிறாள் மனைவி

ஐ லவ் இண்டியா
திஸ் ஈஸ் மை கன்ட்ரி
என்கிறார்கள் குழந்தைகள்

வாழ்க்கை அலுத்தவர்க ளெல்லாம்
கம்ப்யூட்டர் ரசிக்கிறார்களாம் அங்கே
அப்பாவுக்கு ஒண்ணு வாங்கித் தரணும்
நண்பர் யாரேனும் போனால்
ப்ளூ லேபிள் அனுப்பி வைக்கணும்

அம்மாவுக்குத் தாதி
வைக்கச் சொல்லணும்
ஆஸ்த்துமா இன்ஹேலர்கள்
அனுப்பணும்
கிறுகிறுவென்று வராத
அமெரிக்க இன்ஹேலர்கள்
மாத்திரைக்கு மேலென்று
பார்ட்டியில் சொன்னார்
போனவாரம் டாக்ட ரொருவர்

தங்கைக்கு முடிந்தாலே
தும் உதவப் பார்க்கணும்

விடுமுறையில் வழக்கம்போல்
குடும்பத்தை அனுப்பி வைக்கலாம்
கடைசி யிரண்டு வாரம்
அழைத்துவரப் போகலாம்

கள்ளுக்குப் பதில்
கரோனா எக்ஸ்டரா இருக்கிறது
இலக்கியத்துக்கு?
திலீப்குமாருக்கு எழுதினால்
கப்பலில் அனுப்பி வைப்பார்